বৰাক উপত্যকাৰ বানপানী, নদীখহনীয়া আৰু ভূমিস্খলন সমস্যাৰ স্থায়ী সমাধানৰ উদ্দেশ্যে জার্মান আন্তঃৰাষ্ট্ৰীয় পৰামৰ্শদাতা প্রতিষ্ঠান জি এফ এ কনসালটিং গ্ৰুপৰ এটা বিশেজ্ঞৰ দল শিলচৰত উপস্থিত হৈছে।
জাৰ্মানীৰ আন্তঃৰাষ্ট্ৰীয় পৰিৱেশবিদ তথা অভিযন্তা জন ছাছৰ নেতৃত্বত আজি দলটোৱে শিলচৰৰ তাৰাপুৰ শিৱবাৰী পথৰ গাতে লাগি থকা খহনীয়া প্ৰৱণ অঞ্চল পৰিদৰ্শন কৰে। দলটোৱে স্থানীয় প্রশাসন আৰু সংশ্লিষ্ট বিভাগৰ বিষয়া সকলৰ সৈতে কেনেধৰণৰ প্ৰতিৰোধমূলক ব্যৱস্থা গ্ৰহণ কৰিব পাৰি সেই বিষয়ে আলোচনা কৰে।
উল্লেখযোগ্য যে স্থানীয় বাসিন্দসকলৰ সৈতে আলোচনা কৰাৰ পাছত বিগত ৪০ ৰ পৰা ৫০ বছৰত নদীখনৰ গতি বিধিৰ প্ৰকৃতি, খহনীয়াৰ ধৰণ আৰু পৰিৱৰ্তনৰ বিষয়ে তথ্য সংগ্ৰহ কৰা হৈছে।
বিশেষজ্ঞৰ দলটোৰ প্ৰাৰম্ভিক জৰীপৰ পিছত ভূতাত্বিক আৰু পৰিৱেশ জৰীপৰ ভিত্তিত প্ৰতিবেদন প্ৰস্তুত কৰা হ’ব। ভাৰত চৰকাৰৰ ওচৰত দাখিল কৰা এই প্ৰতিবেদনৰ ভিত্তিত প্ৰকল্পটোৱে অনুমোদন লাভ কৰিলে পৰৱৰ্তী পদক্ষেপ লোৱা হ’ব।
