বাৰেৰহণীয়া কাৰ্যসূচীৰে আজি ৩৭ সংখ্যক মৰিগাঁও জিলা দিৱস উদযাপন কৰা হৈছে। এই উপলক্ষে মৰিগাঁও জিলাৰ বিভিন্ন ক্ষেত্ৰত উন্নয়নৰ প্ৰতিফলনৰ লগতে অসমৰ সাংস্কৃতিক ঐতিহ্য প্ৰদৰ্শনৰ ব্যৱস্থা কৰা হয়। ব্ৰহ্মপুত্ৰৰ বুকুৰ মাজত আয়োজিত আজিৰ কাৰ্যসূচীত বিধায়ক ৰমাকান্ত দেউৰী, আছিদ মহম্মদ নাজৰ, জিলা আয়ুক্ত অনামিকা তিৱাৰী, আৰক্ষী অধীক্ষক হেমন্ত কুমাৰ দাসকে ধৰি কেইবাজনো বিশিষ্ট ব্যক্তিয়ে অংশ লয়। বিধায়ক শ্ৰীদেউৰীয়ে ১৯৪২ৰ আন্দোলনত ছহিদ হোৱা মৰিগাঁৱৰ তিনিগৰাকী মুক্তিযুঁজাৰু – হেমৰাম পাটৰ, গুণাভিৰাম বৰদলৈ আৰু তিলক ডেকাৰ আৱক্ষ মূৰ্তিত মাল্যাৰ্পণ কৰে। শিল্পী জুবিন গাৰ্গৰ প্ৰতি শ্রদ্ধাঞ্জলি জনাই আৰম্ভ কৰা অনুষ্ঠানত বৰগীত, জিকিৰ আদিও পৰিবেশন কৰা হয়। ব্ৰহ্মপুত্ৰৰ বুকুত যন্ত্রচালিত নাৱৰ শোভাযাত্রা অনুষ্ঠানৰ বিশেষ আকর্ষণ আছিল। জিলা দিৱসৰ লগত সংগতি ৰাখি প্ৰাকৃতিক সৌন্দৰ্যৰে পৰিবেষ্টিত লাহৰীচৰক বনভোজস্থলী হিচাপে আনুষ্ঠানিকভাৱে স্বীকৃতি দিয়া হয়।