গুৱাহাটী উচ্চ ন্যায়ালয়ৰ নিৰ্দেশমৰ্মে গঠিত সমিতিৰ সদস্যসকলৰ এটা প্রতিনিধি দলে ৰাজ্যৰ বিভিন্ন ঠাইৰ শিশু গৃহ পৰিদৰ্শন কৰি শিশু সুৰক্ষা আৰু নিৰাপত্তাৰ বিভিন্ন দিশ পর্যালোচনা কৰি বিশেষ প্রতিবেদন প্রস্তুত কৰিছে। সমিতিৰ সদস্য ববিতা শ‍ইকীয়া, সুনন্দা দাস আৰু সুবোধ দাসে আজি গোৱালপাৰা জিলাৰ জি ভি এছ শিশু গৃহ পর্যবেক্ষণ কৰে। তদুপৰি তেওঁলোকে কালি মানকাচৰ জিলাৰ বেজা শিশু গৃহ আৰু এটা বিশেষ দত্তক প্রতিষ্ঠান পৰিদর্শন কৰে। তেওঁলোকে শিশু গৃহৰ শিশুসকলৰ অৱস্থাৰ বুজ লোৱাৰ লগতে শিশু ন্যায় আৰু সুৰক্ষা আইন ২০১৫ৰ শুদ্ধ আৰু সম্পূৰ্ণ ৰূপায়নৰ সন্দৰ্ভতো বুজ লয়। পৰিদর্শনকালত প্রতিনিধি দলটোৱে শিশুসকলৰ সুৰক্ষা আৰু নিৰাপত্তাৰ বিষযে শিশু গৃহৰ কৰ্মচাৰী আৰু পৰিচালনা সমিতিৰ সদস্যসকলৰ লগত গুৰুত্বপূর্ণ আলোচনাত মিলিত হয়।