বিধানসভাত বিৰোধী পক্ষৰ নেতা দেৱব্ৰত শ‍ইকীয়াৰ নেতৃত্বত আজি কংগ্ৰেছৰ পাঁচজনীয়া এটা সজাতি দলে ৰাজ্যপাল লক্ষ্মণ প্রসাদ আচাৰ্যক সাক্ষাৎ কৰে। শেহতীয়াকৈ ৰাজ্যৰ বিভিন্ন প্ৰান্তত চলি থকা উচ্ছেদৰ সন্দৰ্ভত দলটোৱে ৰাজ্যপালক স্মাৰক-পত্ৰ প্ৰদান কৰে। ৰাজ্যপালক সাক্ষাৎ কৰি সাংবাদিকৰে হোৱা কথা-বতৰাত তেওঁ কয় যে সোণাপুৰৰ কচুতলিৰ পৰা ধুবুৰীলৈকে ৰাজ্যৰ বিভিন্ন প্ৰান্তত যিসমূহ উচ্ছেদ কার্য চলি আছে, সেয়া কোনো কাৰণতে সমর্থনযোগ্য নহয়। উচ্ছেদৰ ক্ষেত্ৰত উচ্চতম ন্যায়ালয়ৰ নিৰ্দিষ্ট নীতি-নির্দেশনা আছে বুলি উল্লেখ কৰি দেৱব্ৰত শ‍ইকীয়াই কয় যে এই নীতি-নির্দেশনা সম্পূৰ্ণৰূপে অৱমাননা কৰি উচ্ছেদ চলাই থকা হৈছে। এই সমগ্ৰ বিষয়টোত ৰাজ্যপালৰ হস্তক্ষেপ দাবী কৰে সজাতি দলটোৱে। দেৱব্ৰত শ‍ইকীয়াই লগতে কয় যে নিৰ্দিষ্ট নীতি-নিয়মৰ মাজেৰে উচ্ছেদ কৰিলে কাৰো একো আপত্তি নাথাকে। উচ্ছেদৰ জাননী প্ৰেৰণ কৰাৰ এটা নিৰ্দিষ্ট সময়সীমাৰ ভিতৰতহে প্রশাসনে উচ্ছেদ চলাব পাৰে। কিন্তু বিজেপি চৰকাৰৰ নেতৃত্বত প্ৰশাসনে এনে নীতি- নিয়ম মান নচলাকৈ উচ্ছেদ অভিযান অব্যাহত ৰাখিছে।