বৰাক উপত্যকাৰ তিনিখন জিলাৰ উন্নয়নৰ প্ৰতি লক্ষ্য ৰাখি জিলাকেইখনত প্ৰতি মাহে দুজনকৈ মন্ত্রী তিনিদিন থাকিব বুলি আজি অনুষ্ঠিত ৰাজ্যিক মন্ত্ৰীসভাৰ বৈঠকত সিদ্ধান্ত গ্ৰহণ কৰা হয়। দিছপুৰত অনুষ্ঠিত বৈঠকৰ অন্তত সংবাদমেলযোগে মন্ত্রী জয়ন্ত মল্ল বৰুৱাই কয় যে জিলাকেইখনৰ অভিভাৱক মন্ত্ৰীৰ লগতে আন দুজন মন্ত্ৰীয়ে বৰাকত বাহৰ পাতি বিভিন্ন উন্নয়নমূলক আঁচনিৰ পৰ্যালোচনা কৰিব। প্ৰতি মাহে দুগৰাকী মন্ত্ৰী বৰাকৰ জিলা তিনিখনত তিনিদিন ভ্রমণ কৰি বিভিন্ন বিভাগৰ কাম-কাজৰ খতিয়ান ল’ব বুলি মন্ত্ৰী মল্ল বৰুৱাই প্ৰকাশ কৰে। বৰাকৰ জিলা তিনিখন ভ্রমণ কৰা মন্ত্ৰী দুজনে স্থানীয় বিধায়ক, দল-সংগঠনৰ নেতাৰ লগত বিভিন্ন বিষয়ত আলোচনাত মিলিত হোৱাৰ লগতে জিলা আয়ুক্ত আৰু আৰক্ষী অধীক্ষকৰ সৈতেও বিভিন্ন বিষয় আলোচনা কৰিব বুলি তেওঁ লগতে প্ৰকাশ কৰে।