ৰাজ্য চৰকাৰৰ উদ্যোগ, বাণিজ্য আৰু ৰাজহুৱা প্ৰতিষ্ঠান তথা সাংস্কৃতিক পৰিক্ৰমা বিভাগৰ মন্ত্ৰী বিমল বৰা আজি দিহিংচাং সমবায় লিমিটেডৰ উদ্যোগত জৈৱিক পদ্ধতিৰে কৰা কৃষিৰ উৎপাদনক উৎসাহিত কৰাৰ উদ্দেশ্যে বজাৰত বিক্রেতা হিচাপে উপস্থিত হয়। জিলাখনৰ মৰাণৰ দৈনিক বজাৰত ডিজিটেল তুলাচনীৰ সহায়ত আলু বিক্ৰীৰ নিৰ্দেশনাৰে মন্ত্ৰীগৰাকীয়ে স্থানীয় কৃষকসকলক উৎসাহিত কৰাৰ প্ৰয়াস চলায়। উল্লেখযোগ্য যে সমবায় সমিতিখনৰ উদ্যোগত জিৰো টিলেজ আৰু জৈৱিক পদ্ধতিৰে মৰাণৰ কৃষি বীজপামত পৰীক্ষামূলকভাৱে কৰা খেতিত উৎপাদিত আলু আজি প্রতি কিলোগ্ৰামত ২০ টকা দৰত বিক্ৰী কৰা হয়। মন্ত্ৰীগৰাকীয়ে সদৰি কৰা অনুসৰি উদ্যমী কৃষক, আত্মসহায়ক গোট তথা যুৱপ্ৰজন্মক আর্থিকভাৱে স্বাৱলম্বী কৰা আৰু নতুনকৈ ব্যৱসায় কৰা সকলক উৎসাহিত কৰাৰ লক্ষ্যৰে টিংখাং সমষ্টিৰ বিভিন্ন ঠাইত আলু খেতি কৰা হৈছে।