অসম আৰক্ষীৰ তদাৰকী আৰু দুৰ্নীতি নিবাৰক শাখাৰ এটা অভিযানকাৰী দলে আজি দৰং জিলাৰ ছিপাঝাৰত বন বিভাগৰ এজন কৰ্মচাৰীক উৎকোচ লোৱা অৱস্থাত হাতে-লোটে আটক কৰে। নির্দিষ্ট অভিযোগৰ ভিত্তিত দুর্নীতি নিবাৰক শাখাৰ আৰক্ষীয়ে অভিযুক্ত ছিপাঝাৰ কুৰুৱা আঞ্চলিক বন বিষয়াৰ কাৰ্যালয়ৰ কৰ্মচাৰী আমিনুল ইছলামক ধৰিবলৈ বেহু ৰচনা কৰে। ১৫ নম্বৰ ৰাষ্ট্ৰীয় ঘাইপথৰ বিজুলীবাৰীত অভিযোগকাৰীৰ সৈতে অৱস্থান কৰা দুৰ্নীতি নিবাৰক শাখাৰ দলটোৱে পূৰ্বৰ নিৰ্ধাৰিত অনুসৰি ৫ হাজাৰ টকা অভিযোগকাৰীৰ হাতৰ পৰা গ্ৰহণ কৰাৰ সময়তে আমিনুল ইছলামক আৰক্ষীয়ে আটক কৰে। অভিযুক্ত কৰ্মচাৰীগৰাকীয়ে অঞ্চলটোত থকা মাটি কৰিওৱা প্ৰতিখন ডাম্পাৰ, ট্রাক আদিৰ গৰাকীক বন বিভাগৰ পৰা ৰক্ষণাবেক্ষণ দিয়াৰ চৰ্তত মাহে ৩০ হাজাৰ টকাকৈ দাবী কৰা বুলি অভিযোগ উত্থাপন হৈছিল। ধৃত বন কৰ্মচাৰীজনৰ ঘৰ মঙলদৈ চহৰৰ কৰিমচৌকত।