চি পি আই-এমৰ সদ্য প্রয়াত সাধাৰণ সম্পাদক সীতাৰাম য়েচুৰীক নতুন দিল্লীত আজি বিভিন্ন ৰাজনৈতিক দলৰ নেতাই শ্রদ্ধাঞ্জলি জনায়। নতুন দিল্লী এইমছত দীৰ্ঘদিনীয়া অসুস্থতাৰ অন্তত কালি ৭২ বছৰ বয়সত প্রবীণ বাওঁপন্থী ৰাজনীতিকগৰাকীয়ে শেষ নিশ্বাস ত্যাগ কৰিছিল। সীতাৰাম য়েছুৰীৰ নশ্বৰ দেহ ৰাজহুৱা দৰ্শন আৰু শ্ৰদ্ধাঞ্জলি জ্ঞাপনৰ উদ্দেশ্যে দলৰ মুখ্য কাৰ্যালয় এ কে গোপালন ভৱনলৈ অনা হয়। কংগ্ৰেছ সংসদীয় দলৰ অধ্যক্ষ ছোনীয়া গান্ধী, এন চি পি শাৰদ গোটৰ মুৰববী শাৰদ পাৱাৰ, ডি এম কেৰ সাংসদ কানিমোঝি, কংগ্ৰেছ নেতা জয়ৰাম ৰমেশৰ লগতে চি পি আই এমৰ নেতা-কৰ্মীসকলে সীতাৰাম য়েছুৰীৰ প্ৰতি শ্ৰদ্ধাঞ্জলি জ্ঞাপন কৰে। কেৰালাৰ ৰাজ্যপাল আফি মহমদ খান, কেৰালাৰ মুখ্যমন্ত্ৰী পিনাৰাই বিজয়ন, অন্ধ্ৰপ্ৰদেশৰ মুখ্যমন্ত্ৰী এন চন্দ্ৰবাবু নাইডু আৰু বিজেপিৰ ৰাষ্ট্ৰীয় সভাপতি জে পি নাড্ডাই কালি দিল্লীৰ বাসভৱনলৈ গৈ প্ৰয়াত য়েছুৰীৰ প্ৰতি শ্ৰদ্ধাঞ্জলি জ্ঞাপন কৰিছিল।