কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰী জগত প্রকাশ নাড্ডাই NEET-PG, ২০২৬ৰ ৰাষ্ট্ৰীয় যোগ্যতা-সহপ্ৰৱেশ পৰীক্ষাৰ প্ৰস্তুতিৰ পৰ্যালোচনা কৰি পৰীক্ষাটো মসৃণ, নিৰাপদ, স্বচ্ছ আৰু প্রযুক্তি-চালিতভাৱে পৰিচালিত হোৱাটো নিশ্চিত কৰিছে। চলিত মাহৰ ৩০ তাৰিখে এই পৰীক্ষা অনুষ্ঠিত হোৱাৰ কথা।
বৈঠকত মন্ত্ৰীগৰাকীয়ে চিকিৎসা বিজ্ঞানৰ ৰাষ্ট্ৰীয় পৰীক্ষা ব’ৰ্ড এনবিইএমএছ, প্ৰযুক্তিৰ অংশীদাৰ আৰু পৰীক্ষা অনুষ্ঠিত কৰাৰ লগত জড়িত অন্যান্য অংশীদাৰসকলৰ প্ৰস্তুতিৰ মূল্যায়ন কৰে। তেওঁক পৰীক্ষাৰ লজিষ্টিক, প্ৰাৰ্থীৰ সুবিধা প্ৰদানৰ ব্যৱস্থা, নিৰাপত্তা স্থাপত্য আৰু NEET-PG, 2026ৰ বাবে প্ৰৱৰ্তিত প্রযুক্তি-চালিত হস্তক্ষেপৰ বিষয়ে অৱগত কৰা হয়।
মন্ত্ৰীগৰাকীয়ে দৃঢ়তাৰে কয় যে সততা আৰু নিৰাপত্তাৰ উচ্চ মান বজাই ৰাখি এক ন্যায্য, স্বচ্ছ আৰু পৰীক্ষাৰ্থী অনুকূল পৰীক্ষা নিশ্চিত কৰাৰ বাবে সকলো প্ৰচেষ্টা হাতত লোৱা হৈছে। শ্ৰীনাড্ডাই পৰীক্ষাৰ্থীসকলক উৰাবাতৰিৰ বলি নহ’বলৈ আৰু কেৱল এনবিইএমএছ আৰু স্বাস্থ্য আৰু পৰিয়াল কল্যাণ মন্ত্ৰালয়ে জাৰি কৰা চৰকাৰী যোগাযোগৰ ওপৰত নিৰ্ভৰ কৰিবলৈও আহ্বান জনায়। পৰীক্ষা আৰম্ভ হোৱাৰ কিছু সময়ৰ পূৰ্বে অতি সুৰক্ষিত আৰু সময় নিৰ্ধাৰণ প্ৰক্ৰিয়াৰ জৰিয়তে চূড়ান্ত প্রশ্নকাকত নিৰ্বাচন কৰা হৈছে তথা প্ৰযুক্তিগত আৰু কাৰ্য্যকৰী সুৰক্ষাৰ একাধিক স্তৰে নিৰ্ধাৰিত আৰম্ভণিৰ সময়লৈকে ইয়াৰ গোপনীয়তা নিশ্চিত কৰিছে।
মন্ত্ৰীগৰাকীয়ে পৰীক্ষাৰ বাবে লোৱা সামগ্রিক সুৰক্ষা ব্যৱস্থাৰ পৰ্যালোচনাও কৰে। ইয়াৰ উপৰি শ্ৰীনাড্ডাই প্ৰতিজন প্ৰাৰ্থীয়ে যাতে মসৃণ, সুৰক্ষিত আৰু চাপমুক্ত পৰীক্ষা প্ৰক্ৰিয়াৰ অভিজ্ঞতা লাভ কৰে তাৰ বাবে সমন্বয় বজাই ৰাখিবলৈ নিৰ্দেশ দিয়ে।
স্বাস্থ্য আৰু পৰিয়াল কল্যাণ মন্ত্ৰালয়ৰ তথ্য অনুসৰি NEET-PG, 2026 ৰ বাবে মুঠ ২ লাখ ৭৩ হাজাৰ ১৮৩ গৰাকী প্ৰাৰ্থীয়ে পঞ্জীয়ন কৰিছে, যিয়ে পূৰ্বৰ বছৰৰ তুলনাত ১২.৫ শতাংশতকৈ অধিক বৃদ্ধিৰ প্ৰতিনিধিত্ব কৰে। প্ৰায় ৩৪০খন চহৰ আৰু ১৩ শৰো অধিক পৰীক্ষা কেন্দ্ৰত এটা বেলাতে এই পৰীক্ষা অনুষ্ঠিত হ’ব।
