মণিপুৰত কাইলৈ পাহাৰ-ভৈয়ামৰ সমন্বয়ৰ প্ৰতীকস্বৰূপ মেৰা হৌ চুংবা মহোৎসৱ অনুষ্ঠিত হ’ব। মণিপুৰৰ ৰাজ প্ৰসাদ চানা কুনুঙত অনুষ্ঠিত সংবাদমেলত এই মহোৎসৱৰ ৰাজ্যিক পৰ্যায়ৰ উদ্যোক্তা সমিতিৰ প্ৰতিনিধিয়ে জনোৱা অনুসৰি কাইলৈ ঐতিহাসিক কাংলাত মেৰা হৌ চুংবা মহোৎসৱ অনুষ্ঠিত হ’ব। এই মহোৎসৱত মণিপুৰৰ ১৩৫খন গাঁৱৰ গাঁওপ্রধানে অংশগ্রহণ কৰিব। গাঁওপ্রধানসকল আজি ইম্ফলত উপস্থিত হ’ব আৰু মণিপুৰৰ ৰজা তথা ৰাজ্যসভাৰ সাংসদ মহাৰাজ চানজাওবা লেইচেমবাই মণিপুৰৰ ৰাজপ্রাসাদত তেওঁলোকক আনুষ্ঠানিকভাৱে আদৰণি জনাব। কাইলৈ পুৱা মহাৰজা চানজাওবা লেইচেমবাই গাঁও প্ৰধানসকলৰ লগত এখন ধর্মীয় সভাত অংশ ল’ব। ইয়াৰ পাছতে গাঁওপ্ৰধানসকল আৰু ভৈয়ামৰ লোকসকলৰ মাজত প্ৰীতি উপহাৰ বিনিময় পৰ্ব অনুষ্ঠিত হ’ব।