কেন্দ্রীয় কেবিনেটে আয়ুষ্মান ভাৰত প্ৰধানমন্ত্ৰী জন আৰোগ্য যোজনাৰ অধীনত আয় নিৰ্বিশেষে ৭০ বছৰ বয়সৰ উর্ধবৰ সকলো জ্যেষ্ঠ নাগৰিকলৈ স্বাস্থ্য বীমাৰ সুবিধা আগবঢ়োৱাৰ প্ৰস্তাৱত অনুমোদন জনাইছে। কেবিনেট বৈঠকৰ অন্তত কালি নতুন দিল্লীত সাংবাদিকৰ সৈতে হোৱা কথা বতৰাত কেন্দ্ৰীয় মন্ত্ৰী অশ্বিনী বৈষ্ণৱে কয় যে, এই সিদ্ধান্তৰ ফলত জ্যেষ্ঠ নাগৰিকসকলে ৫ লাখ টকা পর্যন্ত বিনামূলীয়া চিকিৎসাৰ সুবিধা লাভ কৰিব। তেওঁ কয় যে, ইয়াৰ পৰা দেশৰ প্ৰায় চাৰে ৪ কোটি পৰিয়াল আৰু ৬ কোটি জ্যেষ্ঠ নাগৰিক উপকৃত হ‘ব। যোগ্য জ্যেষ্ঠ নাগৰিকসকললৈ আয়ুষ্মান ভাৰত প্ৰধানমন্ত্ৰী জন আৰোগ্য যোজনাৰ অধীনত নতুন সুকীয়া কাৰ্ড জাৰি কৰা হ‘ব। যোজনাখনৰ অধীনত ইতিপূৰ্বে সামৰি লোৱা পৰিয়ালৰ ৭০ বছৰ বা তাতকৈ উৰ্ধৰ জ্যেষ্ঠ নাগৰিকসকলে প্ৰতি বছৰে নিজৰ বাবে ৫ লাখ টকা পর্যন্ত টপ আপ কভাৰ অৰ্থাৎ বৰ্তমানৰ পলিচীৰ সীমাতকৈ অধিক ধনৰাশিৰ বীমা সুবিধা লাভ কৰিব। একেদৰে ৭০ বছৰ বা তাতকৈ উৰ্ধৰ অন্য সকলো জ্যেষ্ঠ নাগৰিকে পৰিয়ালৰ ভিত্তি বছৰি ৫ লাখ টকা পর্যন্ত বীমা সুবিধা লাভ কৰিব। ব্যক্তিগত বীমা পলিচী অথবা কৰ্মচাৰী ৰাজ্যিক বীমা আঁচনিৰ অধীনৰ ৭০ বছৰ বা তাৰ উৰ্ধৰ জ্যেষ্ঠ নাগৰিকসকলেও এই যোজনাৰ সুবিধা লাভৰ বাবে যোগ্য বুলি বিবেচিত হ‘ব।