সত্ৰীয়া সংগীত শিক্ষক সমাজৰ উদ্যোগত দৰং জিলা সত্ৰীয়া সংগীত শিক্ষক সমাজ আৰু মঙলদৈ যুৱ সংঘৰ সহযোগত আজিৰে পৰা তিনিদিনীয়াকৈ দ্বাদশ চিন্তন বৈঠক আৰু কৰ্মশালাৰ আয়োজন কৰা হৈছে।
মঙলদৈ জিলা পুঁথিভঁৰাল প্ৰেক্ষাগৃহত আয়োজন কৰা এই কৰ্মশালাত পতাকা উত্তোলন, স্মৃতি তর্পন, বিশিষ্ট ব্যক্তিক সম্বর্ধনা, সত্ৰীয়া সংগীতৰ সন্ধিয়া আদি বিভিন্ন কার্যসূচী অনুষ্ঠিত হয়। অনুষ্ঠানত অসম সত্ৰীয়া সংগীত শিক্ষক সমাজৰ সভাপতি তথা পদ্মভূষণ বঁটাৰে সন্মানিত নৃত্যাচার্য যতীন্দ্রনাথ গোস্বামী, কার্যকৰী সভাপতি গোবিন্দ শইকীয়া বৰবায়ন, সাহিত্য একাডেমী বঁটা প্ৰাপক সত্ৰীয়া নৃত্য শিল্পী ড° মল্লিকা কন্দলী, পদ্মশ্ৰী বঁটাৰে সন্মানিত ওজাপালি শিল্পী দ্রোণ ভূঞাকে ধৰি ভালেসংখ্যক লোক উপস্থিত থাকে।
নৃত্যাচার্য যতীন্দ্রনাথ গোস্বামীয়ে ৰাজ্যৰ বিভিন্ন প্ৰান্তত চৰ্চিত সত্ৰীয়া সংগীতৰ মাজত থকা ভিন্নতা দূৰ কৰি শুদ্ধ শৈলীত ইয়াক প্ৰতিষ্ঠা কৰাই চিন্তন বৈঠকৰ উদ্দেশ্য বুলি উল্লেখ কৰে।
