মহিলা আৰু শিশু বিকাশ মন্ত্রী অজন্তা নেওগে আজি মহিলাৰ ক্ষেত্রত অভিযোগ পঞ্জীয়ন আৰু বিপদৰ বিষয়ে অৱগত কৰাৰ বাবে এটা সুকীয়া মোবাইল এপ্লিকেচন মুকলি কৰে। অসম ৰাজ্যিক মহিলা আয়োগে মহিলাসকলৰ সুৰক্ষা সুনিশ্চিত কৰাৰ উদ্দেশ্যে এই এপ্লিকেচন বিকশাই তুলিছে। শ্রীমতী নেওগে সামাজিক মাধ্যমযোগে কয় যে বহিঃৰাজ্যত থকা অসমৰ মহিলাৰ উপৰি ৰাজ্যৰ মহিলালেও এই এপ্লিকেচনৰ জৰিয়তে ক্ষিপ্ৰতাৰে অভিযোগ দাখিল কৰিব পাৰিব। এপ্লিকেচনটোরে এই অভিযোগসমূহ সংশ্লিষ্ট পক্ষলৈ প্ৰেৰণ কৰি সময় মতে ব্যৱস্থা গ্রহণত সহায় কৰিব বুলি মন্ত্ৰীগৰাকীয়ে উল্লেখ কৰে। অনুষ্ঠানত অংশ লৈ অসম ৰাজ্যিক মহিলা আয়োগৰ অধ্যক্ষ আঙুৰলতা ডেকাই সমাজৰ সকলো স্তৰৰ মহিলাৰ সুবিধার্থে এই এপ্লিকেচনটো অসমীয়া, ইংৰাজী আৰু হিন্দী ভাষাত উপলব্ধ কৰা হৈছে বুলি জানিবলৈ দিয়ে।
অনুষ্ঠানত মহিলা আৰু শিশু বিকাশ বিভাগৰ সঞ্চালক গৌৰী শংকৰ শৰ্মা, অতিৰিক্ত মুখ্য সচিব মুকেশ চাহু আৰু ৰাজ্যিক মহিলা আয়োগৰ সদস্যসকল উপস্থিত থাকে।
