আজিৰেপৰা বলবৎ হোৱা ভাৰত আৰু ব্রিটেইনৰ সৰ্বাত্মক অর্থনৈতিক আৰু বাণিজ্য চুক্তি ভাৰতৰ অর্থনৈতিক বিকাশ আৰু গোলকীয় অংশীদাৰিত্বৰ ক্ষেত্ৰত গুৰুত্বপূৰ্ণ পদক্ষেপ বুলি প্ৰতিৰক্ষা মন্ত্ৰী ৰাজনাথ সিঙে মন্তব্য কৰিছে। সামাজিক মাধ্যমৰ এটা বার্তাযোগে শ্রী সিঙে কয়, যে নতুন চুক্তিয়ে ৰপ্তানি বৃদ্ধি কৰাৰ লগতে ক্ষুদ্র, লঘু আৰু মজলীয়া উদ্যোগৰ ক্ষেত্ৰত ন ন সুযোগৰ সৃষ্টি কৰিব। ইয়াৰ লগতে ভাৰতীয় উদ্যোগক সহায় আগবঢ়োৱাৰ উপৰি ব্রিটেইনত থকা ভাৰতীয় পেছাদাৰীসকলকো নিয়োগ আৰু বিনিয়োগৰ ক্ষেত্রত সহযোগিতা আগবঢ়াব। প্রধানমন্ত্রী নৰেন্দ্ৰ মোদীৰ নেতৃত্বত ভাৰতে দেশৰ অৰ্থনীতিৰ সৱলীকৰণ আৰু বিকশিত ভাৰতৰ যাত্রা শক্তিশালী কৰাৰ বাবে আন্তঃৰাষ্ট্ৰীয় ক্ষেত্ৰত সুযোগ-সুবিধাৰ সম্প্ৰসাৰণৰ প্ৰচেষ্টা অব্যাহত ৰাখিছে বুলিও তেওঁ মন্তব্য কৰে। কেন্দ্রীয় গ্রাহক পৰিক্ৰমা মন্ত্রী প্রহ্লাদ যোশীয়ে কয়, যে এই চুক্তিয়ে দেশৰ অর্থনৈতিক ক্ষেত্ৰখন শক্তিশালী কৰাৰ লগতে কৃষক আৰু কৃষিক্ষেত্ৰক সুৰক্ষিত কৰিব। ইয়াৰ ফলত ভাৰত আৰু ব্রিটেইনৰ মাজত অর্থনৈতিক বান্ধোন শক্তিশালী হ’ব বুলি তেওঁ আশা প্রকাশ কৰে।