প্ৰলয়ংকৰী বানত ক্ষতি হোৱা পশুধনৰ বাবেও পৰিয়ালসমূহক ধন প্ৰদান কৰা হ’ব। সেই অনুসৰি একোটা গৰুৰ বাবদ ৩৭ হাজাৰ ৫০০ টকা, প্ৰতিটো ছাগলী আৰু গাহৰিৰ বাবে ৪ হাজাৰ টকাকৈ আৰু প্ৰতিটো হাঁহ-কুকুৰাৰ বাবে ১০০ টকাকৈ প্ৰদান কৰা হ’ব। বানত নষ্ট হোৱা তাঁতশালসমূহৰ প্ৰতিখনৰ বাবদ ৫ হাজাৰ টকাকৈ প্ৰদান কৰা হ’ব।
একেদৰে নষ্ট হোৱা কৃষিৰ বাবেও ৰাজ্য চৰকাৰে ক্ষতিগ্রস্তসকলক আর্থিক সাহায্য আগবঢ়াব। বানে ক্ষতি কৰা অংগনৱাড়ী কেন্দ্ৰসমূহৰ পুনৰনিৰ্মাণৰ বাবে ২ লাখৰ পৰা আঢ়ৈ লাখ পর্যন্ত অনুদান আগবঢ়োৱা হ’ব। সেইদৰে বিদ্যালয়সমূহলৈও ২ লাখকৈ টকা দিয়া হ’ব। পৰিয়ালসমূহে ন্যূনতম নথিপত্ৰৰ বিনিময়ত এই আর্থিক সাহায্য লাভ কৰিব।
উল্লেখযোগ্য যে ৰাজ্যৰ বান পৰিস্থিতি পূৰ্বতকৈ উন্নত হৈছে যদিও ৫ খন জিলাৰ বিস্তীর্ণ অঞ্চল এতিয়াও বানত বুৰ গৈ আছে। ইয়াৰে গোলাঘাট, শিৱসাগৰ, চৰাইদেউ, যোৰহাট আৰু ধেমাজি জিলাৰ ৩৩৫ খন গাঁও এতিয়াও বানৰ কবলত আছে। বানত ১ লাখ ৩৬ হাজাৰ ২০৩ জন লোক প্ৰভাৱিত হৈছে। তদুপৰি ১৫ হাজাৰ ৪২২ হেক্টৰ কৃষিভূমি পানীৰ তলত আছে। ৰাজ্যখনত শেহতীয়া বানত মৃত্যু হোৱা লোকৰ সংখ্যা ৮৫ হৈছেগৈ।
