পর্যটন, মহিলা আৰু শিশু বিকাশ মন্ত্রী অজন্তা নেওগে আজি কামৰূপ জিলাৰ বকোৰ বামুণীগাঁৱত নির্মীয়মান সংহত বৃদ্ধাশ্ৰম আৰু শিশু প্রতিপালন কেন্দ্ৰৰ নিৰ্মাণকাৰ্য পৰিদৰ্শন কৰে।
প্রায় ৮৫ কোটি টকা ব্যয় সাপেক্ষে উত্তৰ-পূৰ্বাঞ্চলৰ ভিতৰতে প্ৰথমবাৰৰ বাবে এইদৰে বৃহৎ পৰিসৰত নিৰ্মাণ কৰা কেন্দ্ৰটোৰ নিৰ্মাণকাৰ্যৰ অগ্ৰগতিৰ বুজ লৈ মন্ত্ৰীগৰাকীয়ে কামৰ মানক লৈ কোনোধৰণৰ আপোচ নকৰিবলৈ নির্দেশ দিয়ে। এই ভ্রমণকালত মন্ত্ৰীগৰাকীয়ে বিভাগীয় বিষয়া-কর্মচাৰীসকলৰ সৈতে এখন পর্যালোচনা সভাতো মিলিত হয়।
উল্লেখযোগ্য ৬৫ বিঘা ভূমিত নিৰ্মাণ কৰা এই সংহত কেন্দ্রত শিশু, বয়োজ্যেষ্ঠসকলৰ বাবে সুকীয়া গৃহ থাকিব, য’ত একে সময়তে ৩৪৪ গৰাকী কিশোৰ-কিশোৰী, বিশেষভাবে সক্ষম ল’ৰা-ছোৱালী আৰু বৃদ্ধ আৱাসী থাকিব পাৰিব। তদুপৰি এই কেন্দ্রত বিনোদন কক্ষ, প্রেক্ষাগৃহ, শ্ৰেণীকোঠা, পৰামৰ্শদান কক্ষৰ লগতে এখন চিকিৎসালয়ো থাকিব।
