প্রধানমন্ত্ৰী নৰেন্দ্ৰ মোদীয়ে আজি দ্বিপাক্ষিক সম্পর্ক অধিক শক্তিশালী কৰাৰ লক্ষ্যৰে ইণ্ডোনেছিয়াৰ ৰাষ্ট্ৰপতি প্ৰব’ও ছুবিয়ানটোৰ সৈতে প্ৰতিনিধি পৰ্যায়ৰ আলোচনাত মিলিত হয়। এই আলোচনা কালত তেওঁ দেশদুখনৰ বৈদেশিক সম্পৰ্কৰ পৰ্যালোচনা কৰাৰ লগতে আৰু মূল খণ্ডসমূহৰ মাজত সহযোগিতা অধিক শক্তিশালী কৰাৰ উপায় অন্বেষণ কৰিব। পাৰস্পৰিক স্বাৰ্থৰ ক্ষেত্ৰত সহযোগিতা বৃদ্ধিৰ লক্ষ্যৰে দেশ দুখনে বুজাবুজিৰ চুক্তিত স্বাক্ষৰ কৰিব। প্ৰধানমন্ত্ৰী মোদীৰ সন্মানত ৰাষ্ট্ৰপতি প্রব’ও ছুবিয়ানটোৱে আয়োজন কৰা ৰাজ্যিক ভোজৰ জৰিয়তে দিনজোৰা কাৰ্যসূচীৰ সামৰণি পৰিব। ইয়াৰ পিছত প্ৰধানমন্ত্ৰী মোদীয়ে প্ৰবাসী ভাৰতীয়সকলৰ সৈতে মত বিনিময় কৰিব। এই ভ্রমণে ভাৰত-ইণ্ডোনেছিয়াৰ সৰ্বাংগীন কৌশলগত অংশীদাৰিত্ব আৰু অধিক গভীৰ কৰি তুলিব আৰু দুয়োখন দেশৰ মাজত দীৰ্ঘদিনীয়া বন্ধুত্বক অধিক শক্তিশালী কৰিব বুলি আশা কৰা হৈছে।