নির্বাচন আয়োগে কৈছে যে, দেশৰ ১৩ খন ৰাজ্য আৰু কেন্দ্ৰীয়শাসিত অঞ্চলৰ ৮৮ টা সমষ্টি সামৰি হ’বলগীয়া দ্বিতীয় পৰ্য্যায়ৰ লোকসভা নিৰ্বাচনৰ বাবে এহেজাৰ ২১০ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়োৱাটো নিশ্চিত হৈছে। এই সমষ্টিকেইটাৰ বাবে মুঠ দুহেজাৰ ৬৩৩ খন মনোনয়ন পত্র দাখিল কৰা হৈছিল। পৰীক্ষাৰ অন্তত এহেজাৰ ৪২৮ গৰাকী প্ৰাৰ্থীৰ মনোনয়ন বৈধ বিবেচিত হৈছিল। দ্বিতীয় পৰ্য্যায়ৰ বাবে কালি মনোনয়ন পত্ৰ প্ৰত্যাহাৰৰ অন্তিম দিন আছিল। দ্বিতীয় পৰ্য্যায়ৰ বাবে ২৬ এপ্ৰিলত ভোটগ্ৰহণ কৰা হ’ব। দ্বিতীয় পৰ্যায়ত কেৰালাৰ ২০ টা সংসদীয় সমষ্টিৰ বাবে সৰ্বাধিক ৫০০ আৰু কৰ্ণাটকৰ ১৪ টা সমষ্টিৰ বাবে ৪৯১ গৰাকী প্ৰাৰ্থীয়ে মনোনয়ন দাখিল কৰিছে।