১৩৫ সংখ্যক ডুৰাণ্ড কাপ ফুটবল প্রতিযোগিতাত নর্থ ইষ্ট ইউনাইটেড ফুটবল ক্লাবে কোৱাৰ্টাৰ ফাইনেলত প্ৰৱেশ কৰিছে। দলটোৱে কালি গুৱাহাটীৰ ইন্দিৰা গান্ধী ষ্টেডিয়ামত অনুষ্ঠিত গ্রুপ-এফ পৰ্যায়ৰ নিজৰ অন্তিমখন খেলত এফ চি ৱানক ৩-১ গ’লৰ ব্যৱধানত পৰাস্ত কৰে।
গ্ৰুপ পৰ্যায়ত নর্থ ইষ্ট ইউনাইটেডে তিনিখন খেলতে জয়লাভ কৰি শীৰ্ষস্থানত থকাৰ বিপৰীতে প্ৰতিযোগিতাখনত প্ৰথমবাৰৰ বাবে অংশগ্ৰহণ কৰা এফ চি ৱানে তিনিখন খেলৰ পৰা ৩ পইণ্ট অৰ্জন কৰিবলৈ সমৰ্থ হয়।
প্ৰতিযোগিতাত আজি হ’বলগীয়া গ্রুপ-ডিৰ এখন গুৰুত্বপূৰ্ণ খেলত NEROCA ফুটবল ক্লাব এফ চি ৰেংডাইৰ মুখামুখি হ’ব। খেলখন বিয়লি ৪ বজাত ইম্ফলৰ খুমান লাম্পাক মেইন ষ্টেডিয়ামত খেলোৱা হ’ব। ইপিনে সন্ধিয়া ৭ বজাত কলকাতাৰ কিশোৰ ভাৰতী ক্রীড়াংগণত হ’বলগীয়া গ্রুপ-বিৰ এখন খেলত মহমেদান স্পর্টিং ক্লাব ইণ্ডিয়ান আর্মী ফুটবল টীমৰ বিৰুদ্ধে অৱতীৰ্ণ হ’ব।
