ইলেকট্রনিক্স আৰু তথ্য প্রযুক্তি মন্ত্রী অশ্বিনী বৈষ্ণবে চেমিকণ্ডাক্টৰ উদ্যোগৰ গোলকীয় প্রেক্ষাপটত ভাৰত অন্যতম বিশ্বাসী অংশীদাৰৰূপে উজলি উঠা বুলি মন্তব্য কৰিছে। আজি নতুন দিল্লীত ছেমিকন ইণ্ডিয়া ২০২৬ ৰ এটা কাৰ্যসূচীত অংশগ্ৰহণ কৰি শ্রীবৈষ্ণৱে কয় যে চেমিকণ্ডাক্টৰ উদ্যোগত বিশ্বাসৰ পাত্ৰ হোৱাটো অতিকৈ গুৰুত্বপূৰ্ণ কাৰক।
বিশ্বৰ বিভিন্ন প্ৰান্তৰ প্রতিষ্ঠানসমূহে ভাৰততে সামগ্ৰীৰ আৰ্হি প্ৰস্তুত কৰি উৎপাদন কৰাৰ সূচল পৰিবেশ সৃষ্টি কৰা আৰু সেইসমূহৰ বৌদ্ধিক সম্পত্তিৰ সুৰক্ষা সুনিশ্চিত কৰাৰ ক্ষেত্ৰত বিশ্বাসেই মূল চালিকাশক্তি বুলি তেওঁ লগতে কয়। ভাৰতে অহা ১০ বছৰৰ ভিতৰত ৮৫ হাজাৰ চেমিকণ্ডাক্টৰ আৰ্হি প্রস্তুতকাৰী অভিযন্তাক প্রশিক্ষণ প্ৰদানৰ লক্ষ্যৰে আগবঢ়া বুলি উল্লেখ কৰি যোৱা ৪ বছৰত ইতিমধ্যে ৭০ হাজাৰ অভিযন্তাক প্রশিক্ষিত কৰা হৈছে বুলি শ্রীবৈষ্ণবে জানিবলৈ দিয়ে।
অনুষ্ঠানৰ শেষত সাংবাদিকৰ সৈতে হোৱা কথা বতৰাত শ্রীবৈষ্ণবে চেমিকন ইণ্ডিয়াত একোখন দেশৰ পৰা আনকি ৩০ টাৰো অধিক প্রতিষ্ঠানে বিভিন্ন পেভেলিয়নত অংশগ্ৰহণ কৰা বুলি প্রকাশ কৰে। চেমিকণ্ডাক্টৰ খণ্ডত ১ লাখৰো অধিক নিয়োগৰ সুযোগ সৃষ্টি হোৱাৰ সম্ভাৱনা আছে বুলিও মন্ত্ৰীগৰাকীয়ে উল্লেখ কৰে।
