আজি পৱিত্র শাওণ মাহৰ প্ৰথমটো সোমবাৰ। ৰাজ্যৰ বিভিন্ন প্ৰান্তৰ মঠ-মন্দিৰত এই উপলক্ষে পুৱাৰেপৰা ভক্তসকলে পূজা-অৰ্চনাৰ বাবে সমৱেত হৈছে। জনবিশ্বাস অনুসৰি মহাদেৱৰ আশিস লাভৰ বাবে এই বিশেষ দিনটোত শিৱলিংগত জল আৰু নৈবেদ্য অৰ্পণ কৰা হয়। গোৱালপাৰা জিলাৰ ঐতিহাসিক পাগলাৰটেক শিৱমন্দিৰত পুৱতি নিশাৰে পৰা ভক্তসকলে পূজা-অৰ্চনা কৰিছে। প্ৰবাদমতে চান্দ সদাগৰৰ দিনৰ পৰাই ঐতিহাসিক পাগলাৰটেক শিৱ মন্দিৰত পূজা-অৰ্চনা চলি আহিছে। গুৱাহাটীৰ শুক্ৰেশ্বৰ দেৱালয়, বশিষ্ঠাশ্ৰম, পামহিৰ ভীমাশংকৰ মন্দিৰ, তেতেলিয়াৰ সোমনাথ মন্দিৰকে ধৰি বিভিন্ন স্থানত আজি ভক্তসকলে পুৱাৰেপৰা পূজা-অৰ্চনাৰ বাবে সমবেত হৈছে।
উত্তৰ গুৱাহাটী ঐতিহ্যমণ্ডিত মণিকৰ্ণেশ্বৰ দেৱালয়তো ভক্তসকলে শৰাই-নৈবদ্যৰে মহাদেৱৰ পূজাঅৰ্চনা কৰা পৰিলক্ষিত হয়।
বকোৰ যমুনেশ্বৰ শিৱালয়ৰ পৰাও বহু ভক্তই শাওণমহীয়া জলযাত্ৰা কৰা দেখা যায়। তেজপুৰৰ শ্ৰীশ্ৰীমহাভৈৰৱ দেৱালয়ত বহুসংখ্যক ভক্তই ভগৱান শিৱৰ উপাসনা আৰু পূজা কৰে ।
