● পেৰুৰ পাটাজ প্ৰদেশৰ পৰা অপহৃত ১৩ গৰাকী খনি ৰখীয়াৰ মৃতদেহ উদ্ধাৰ হৈছে। আৰক্ষী সূত্ৰৰ উদ্ধৃতিৰে দেশখনৰ স্থানীয় সংবাদ মাধ্যমে প্ৰকাশ কৰা মতে চকুত বান্ধি থোৱা তথা হাত-ভৰি বান্ধি ৰখা অৱস্থাত উদ্ধাৰ হোৱা লোককেইজনক গুলীয়াই হত্যা কৰা হৈছে। লা পড়েৰোছা নামৰ খনি প্রতিষ্ঠানটোৱে প্ৰকাশ কৰা মতে অপৰাধ জগতৰ সৈতে জড়িত অবৈধ খননকাৰীৰ গোটে এই খণ্ডত সেৱা আগবঢ়োৱা ১৩ জন কৰ্মীক অপহৰণ কৰিছিল। দুৰ্ভগীয়া কৰ্মীকেইজনৰ পৰিয়ালৰ সূত্ৰই জানিবলৈ দিয়া মতে কৰ্মৰত অৱস্থাত থকা এই ৰখীয়াকেইজনৰ সৈতে যোৱা ২৭ এপ্ৰিলৰ পৰা তেওঁলোকৰ সংযোগ বিচ্ছিন্ন হৈছিল। তেওঁলোকৰ মুক্তিৰ বিনিময়ত অপহৰণকাৰী দলে প্রতিষ্ঠানটোৰ পৰা বৃহৎ অংকৰ মুক্তিপণ দাবী কৰিছিল বুলিও প্ৰকাশ পাইছে।