বৰপেটা জিলাত গাঁও পঞ্চায়ত আৰু পৌৰসভা পৰ্যায়ৰ খেল মহাৰণৰ প্ৰতিযোগিতাসমূহৰ সামৰণি পৰাৰ পাছত বিধানসভা সমষ্টি ভিত্তিক আৰু জিলা পৰ্যায়ৰ প্ৰতিযোগিতা অনুষ্ঠিত কৰাৰ প্ৰস্তুতি চলোৱা হৈছে। ইয়াৰ বাবে কালি জিলা আয়ুক্তৰ কাৰ্যালয়ত প্ৰশাসনীয় স্তৰৰ এখন পৌৰসভা অনুষ্ঠিত হয়। এই সভাত পৌৰসভা আৰু গাঁও পঞ্চায়ত পৰ্যায়ত প্রতিযোগিতা অনুষ্ঠিত হোৱাৰ সময়ত হোৱা অভিজ্ঞতাৰ আধাৰত দুটা সিদ্ধান্ত গ্ৰহণ কৰা হয়। জিলা আয়ুক্তৰ সভাপতিত্বত অনুষ্ঠিত সভাখনত গৃহীত সিদ্ধান্ত দুটা হ’ল খেলৰ সময়ত প্ৰয়োজন হোৱা চিকিৎসা সাহাৰ্য পর্যাপ্ত পৰিমাণে যোগান ধৰা আৰু আৰক্ষীৰ পৰা প্ৰয়োজনীয় সহযোগিতা গ্ৰহণ কৰা। বৰপেটা জিলাত এইবাৰৰ দ্বিতীয় পৰ্যায়ৰ খেল মহাৰণত ৩ লাখৰো অধিক খেলুৱৈয়ে অংশগ্ৰহণ কৰে। পৌৰসভা আৰু গাঁও পঞ্চায়তত তেওঁলোকৰ মাজত অনুষ্ঠিত কৰা প্ৰতিযোগিতাৰ জৰিয়তে বিধানসভা পৰ্যায়ৰ খেলুৱৈ বাছনি কৰা হৈছে।