অসম ৰাজ্যিক বিদ্যালয় পৰিষদৰ অন্তৰ্গত এই বছৰৰ হাইস্কুল শিক্ষান্ত পৰীক্ষাৰ ফলাফলসমূহ কাইলৈ ঘোষণা কৰাৰ সম্ভাৱনা আছে। যোৱা ফেব্ৰুৱাৰী মাহত অনুষ্ঠিত এই পৰীক্ষাৰ ফলাফল অভিলেখ সময়ৰ ভিতৰত এইবাৰ ঘোষণা কৰাৰ দিহা কৰা হৈছে। আমাৰ বিশেষ সংবাদদাতাই জনোৱা মতে পৰীক্ষাৰ ফলাফল কাইলৈ ঘোষণা কৰা সন্দৰ্ভত পৰিষদৰ তৰফৰ পৰা চৰকাৰীভাৱে এতিয়াও একো জনোৱা হোৱা নাই যদিও কাইলৈ পুৱাৰ ভাগত এই সম্পৰ্কীয় চৰকাৰী অধিসূচনা জাৰি কৰাৰ সম্ভাৱনা আছে।