কেন্দ্ৰীয় অসামৰিক পৰিবহণ মন্ত্ৰ্যালয়ে ৰাজ্যখনত দুটা গ্ৰীন ফিল্ড বিমানবন্দৰ নিৰ্মাণৰ বাবে প্ৰস্তাৱ লাভ কৰিছে। ৰাজ্যসভাত কালি এটা প্ৰশ্নৰ উত্তৰত অসামৰিক বিমান পৰিবহণ ৰাজ্য মন্ত্ৰী মুৰলীধৰ মোহনে এই কথা প্ৰকাশ কৰে। মন্ত্ৰীগৰাকীয়ে কয় যে কেন্দ্ৰীয় চৰকাৰে এতিয়ালৈকে ২১টা গ্ৰীন ফিল্ড বিমানবন্দৰ নিৰ্মাণৰ বাবে অনুমোদন জনাইছে। ইয়াৰে ভিতৰত ১২ টা গ্ৰীন ফিল্ড বিমানবন্দৰ বৰ্তমান কাৰ্যক্ষম হৈ আছে আৰু ৯ টা কাৰ্যক্ষম হ’বলৈ এতিয়াও বাকী আছে। ইয়াৰ উপৰি কাছাৰ আৰু কাৰ্বি আংলঙকে ধৰি দেশৰ ১১টা ভিন্ন স্থানত নতুন গ্ৰীন ফিল্ড বিমান বন্দৰ নিৰ্মাণ কৰাৰ বাবে মন্ত্ৰ্যালয়ে প্ৰস্তাৱ লাভ কৰিছে বুলিও তেওঁ লগতে প্ৰকাশ কৰে। কেন্দ্ৰীয় মন্ত্ৰীগৰাকীয়ে কয়, যে দেশৰ ভিতৰুৱা অঞ্চলসমূহতো বিমান যোগাযোগ উন্নত কৰাৰ লক্ষ্যৰে কেন্দ্ৰীয় চৰকাৰে ২০১৬ চনৰ অক্টোবৰত উড়ান আঁচনিৰ শুভাৰম্ভ কৰিছে।