ভাৰতৰ লক্ষ্য সেন আৰু পি ভি সিন্ধুৱে ছাৰব্ৰুকেনত অনুষ্ঠিত হাইল’ অপেন বেডমিণ্টন প্ৰতিযোগিতাত পুৰুষ আৰু মহিলাৰ ছিংগলছৰ খিতাপ জয় কৰিছে। পি ভি সিন্ধুৱে কালি ফাইনেলত ডেনমার্কৰ লাইন কজৰ্ছফেল্ডক ২১-১২, ২১-১৪ৰ ব্যৱধানত পৰাস্ত কৰি হাইল’ অপেনৰ ছিংগলছৰ খিতাপ দখল কৰা প্ৰথমগৰাকী ভাৰতীয় মহিলা হিচাপে বিবেচিত হয়। ইপিনে লক্ষ্য সেনে ফাইনেলত যোৱাবাৰৰ চেম্পিয়ন ইণ্ডোনেছিয়াৰ জোনাটন ক্রিস্তিক ২১-১৭, ২১-১০ৰ ব্যৱধানত পৰাস্ত কৰি দ্বিতীয়বাৰৰ বাবে এই প্রতিযোগিতাত পুৰুষৰ ছিংগলছৰ খিতাপ জয় কৰে। এয়া হৈছে লক্ষ্যৰ চলিত বছৰৰ প্ৰথমটো বি ডব্লিউ এফ খিতাপ ।