বড়ো আন্দোলনৰ প্ৰথম শ্বহীদ সুজিত নাৰ্জাৰীৰ সোঁৱৰণত বি টি চি প্ৰশাসনে ৪০ টা পৰিষদীয় সমষ্টিত প্ৰেক্ষাগৃহ নিৰ্মাণৰ আঁচনি প্ৰস্তুত কৰিছে। এই অনুসৰি বিটিচিৰ মুখ্য কাৰ্যবাহী সদস্য প্রমোদ বড়োৱে আজি জিলা সদৰ কাজলগাঁও বজাৰৰ ওচৰত এটা প্ৰেক্ষাগৃহ নিৰ্মাণৰ আধাৰশিলা স্থাপন কৰে। কাৰ্যসূচী ৰূপায়ণ কৰি শ্ৰী বড়োৱে প্ৰেক্ষাগৃহটোত ছশৰ পৰা সাতশ জন লোক বহিব পাৰিব বুলি ব্যক্ত কৰে। তেওঁ এবছৰত প্ৰেক্ষাগৃহটোৰ নিৰ্মাণ সম্পূৰ্ণ হ’ব বুলি জানিবলৈ দিয়ে। আধাৰশিলা স্থাপন অনুষ্ঠানত ৰাজ্যসভাৰ সাংসদ ৰণগৌড়া নাৰ্জাৰী, লোকসভাৰ সাংসদ জয়ন্ত বসুমতাৰী আৰু বিটিচিৰ পৰিষদীয় সদস্য মাধৱ চন্দ্ৰ চেত্ৰীকে ধৰি ইউ পি পি এলৰ দলীয় নেতাকর্মী উপস্থিত থাকে। ইয়াৰ পাছত বিটিচিৰ মুখ্য কাৰ্যবাহী সদস্যজনে জিলাখনৰ গৰুভাষা, ইছলাকাটা, চান্দপুৰ, খাগ্ৰাবাৰী আৰু কিষাণবজাৰত পকী দলঙৰ আধাৰশিলা স্থাপন কৰে।