কাৰ্বি আংলঙৰ পি জি আৰ আৰু ভি জি আৰ ভূমি দখল কৰি থকা লোকসকলৰ বিৰুদ্ধে উচ্ছেদ অভিযান চলোৱাৰ বাবে আজিৰেপৰা জাননী জাৰি কৰা হ’ব। ১৫ দিনৰ ভিতৰত ভূমি খালী নকৰাসকলৰ বিৰুদ্ধে উচ্ছেদ অভিযান চলোৱা হ’ব বুলি কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে প্ৰকাশ কৰিছে। যোৱা ২৬ ডিচেম্বৰত ৰাজ্য চৰকাৰৰ সৈতে অনুষ্ঠিত ত্রিপাক্ষিক বৈঠক পাছত এই সিদ্ধান্ত গ্রহণ কৰা হয়। এই ভূমি দখলমুক্ত কৰাক লৈ কাৰ্বি পাহাৰত সৃষ্টি হোৱা প্রতিবাদমুখৰ পৰিস্থিতিৰ পৰিপ্ৰেক্ষিতত আন্দোলনকাৰী আৰু কাৰ্বিআংলং স্বায়ত্তশাসিত পৰিষদৰ সৈতে ৰাজ্য চৰকাৰৰ বৈঠক অনুষ্ঠিত হৈছিল। এই অনুসৰি খেৰণি আৰু উত্তৰ বৰবিলৰ ৩৩৯ টা পৰিয়ালৰ বাহিৰে বাকীসকলক সেই স্থান খালী কৰিবলৈ জাননী জাৰি কৰা হ’ব। লগতে পিজিআৰ ভূমিত থকা ব্যৱসায় প্রতিষ্ঠানসমূহৰ বাণিজ্যিক অনুজ্ঞা বাতিল কৰা হ’ব। মাঘ বিহুৰ পাছতে বকলীয়াঘাটৰ জলসিঞ্চন বিভাগৰ ভূমিত থকা এহেজাৰটা পৰিয়ালক উচ্ছেদ কৰা হ’ব।