وزیراعظم مودی نے واشنگٹن ڈی سی میں وہائٹ ہاﺅس میں امریکی صدر جوبائیڈن سے ملاقات کی۔ انہوں نے امریکہ کی سرکردہ کمپنیوں کے سی ای اوز کے ساتھ تبادلہ خیال کیا

Jun 22, 2023

8:57AM

وزیراعظم مودی نے واشنگٹن ڈی سی میں وہائٹ ہاﺅس میں امریکی صدر جوبائیڈن سے ملاقات کی۔ انہوں نے امریکہ کی سرکردہ کمپنیوں کے سی ای اوز کے ساتھ تبادلہ خیال کیا

Tweeted By AIR

اپنی میٹنگ کے دوران وزیراعظم مودی نے صدر بائیڈن اور خاتون اول کو خصوصی تحفے پیش کئے۔ انہوں نے جناب بائیڈن کو صندل کی لکڑی سے تیار کردہ ایک ڈبہ پیش کیا جس پر حیاتیات اور نباتات کی نقش نگاری کی گئی ہے۔ یہ ڈبہ راجستھان کے ایک چوٹی کے دستکار نے کرناٹک کے میسور سے حاصل شدہ صندل کی لکڑی سے تیار کیا ہے۔ انہوں نے ساتھ ہی خاتون اول کو بھی لیباریٹری میں تیار کردہ سات اعشاریہ پانچ قیراط کا ایک سبز ہیرا پیش کیا، جو زمین سے حاصل کردہ ہیروں کی کیمیات کی خصوصیات پیش کرتاہے اور ماحولیات کے لیے سازگار ہے۔ وزیراعظم نے صدر بائیڈن کو The Ten Principal Upanishads نامی کتاب کا انگریزی ترجمہ بھی پیش کیا۔ اِس سے قبل وزیراعظم نریندر مودی نے مائیکرون ٹیکنالوجی، جنرل الیکٹرک اور جنرل الیکٹرک ایرو اسپیس اور اپلائڈ میٹریلس سمیت امریکہ کی سرکردہ کمپنیوں کے CEOs کے ساتھ الگ الگ میٹنگیں کیں۔

جناب مہروترا نے کہا کہ جناب مودی کے ساتھ اُن کی ملاقات شاندار رہی۔ مائیکرون ٹیکنالوجی کے CEO نے کہا کہ وہ بھارت کیلئے وزیراعظم نریندر مودی کے وِژن اور بھارت کی ترقی سے بے حد متاثر ہیں۔ جناب مہروترا نے کہا کہ وزیراعظم مودی کے ساتھ انہوں نے بہت سارے موضوعات پر تبادلہ خیال کیا اور وہ بھارت میں وسیع مواقع کے منتظر ہیں۔

جناب Dickerson نے کہا کہ وہ بھارت سے بہت متاثر ہیں اور اُن کا خیال ہے کہ سیمی کنڈکٹر انڈسٹری میں بھارت کیلئے ابھی ترقی کا موقع ہے۔ انہوں نے کہا کہ یہ بھارت کیلئے ناقابل یقین ترقی کو آگے بڑھانے کا بھی وقت ہے۔ جناب Dickerson نے کہا کہ بھارت ایک قابل اعتماد شراکت دار ہے اور دنیا کے بہت سے ممالک بھارت کے بھروسے اور زبردست ہُنر کو دیکھ رہے ہیں۔ انہوں نے کہا کہ یہ بھارت کے چمکنے کا وقت ہے۔ اپلائڈ میٹریلس کے CEO نے کہا کہ اُن کی کمپنی جلد ہی بھارت میں ایک اختراعی مرکز کا اعلان کرے گی جو آلات میں اختراع پر توجہ مرکوز کرے گا۔ انہوں نے اعتماد ظاہر کیا کہ بھارت کے ساتھ مل کر کام کرکے وہ زبردست کامیابی حاصل کرسکتے ہیں۔

اِس سے پہلے وزیراعظم مودی اور امریکہ کی خاتون اول جِل بائیڈن نے کل شام Alexandria، ورجینیا میں نیشنل سائنس فاﺅنڈیشن NSF کا دورہ کیا۔ انہوں نے بھارت اور امریکہ کے طلباءسے ملاقات کی جو دونوں ممالک کی معیشتوں کیلئے اہم صنعتوں میں کامیابی حاصل کرنے کیلئے مہارتیں سیکھ رہے ہیں۔

اس موقع پر اظہار خیال کرتے ہوئے جناب مودی نے کہا کہ ترقی کی رفتار کو برقرار رکھنے کیلئے بھارت اور امریکہ کو متنوع صلاحیت کی ضرورت ہے۔

وزیراعظم نے کہا کہ تعلیم، تحقیق اور اختراع ایک روشن مستقبل کیلئے نہایت اہم ہیں۔ انہوں نے کہا کہ بھارت میں حکومت نئی تعلیمی پالیسی لے کر آئی ہے جس میں تعلیم اور ہنرمندری کو باہم مربوط کیا گیا ہے۔

جناب مودی نے کہا کہ بھارت نیشنل سائنس فاﺅنڈیشن کے ساتھ متعدد پروجیکٹوں پر کام کررہا ہے اور بھارت کا ہدف اِس دہائی کو ٹیکنالوجی کی دہائی بنانا ہے۔

وزارت خارجہ کے ترجمان ارندم باگچی نے کہا کہ جناب مودی اور امریکی خاتون اول نے نوجوانوں کے درمیان پیشہ وارانہ تعلیم اور ہُنرمندی کو فروغ دینے پر مرکوز ایک منفرد پروگرام میں شرکت کی۔

اِس موقع پر اظہار خیال کرتے ہوئے جناب مودی نے اِس بات پر خوشی کا اظہار کیا کہ واشنگٹن DC کا دورہ کرنے کے فوراً بعد انہوں نے نوجوان اور تخلیقی افراد سے ملاقات کی۔

وزیراعظم نے اِس پروگرام کی منصوبہ بندی اور کامیاب انعقاد کیلئے امریکی خاتون اول جِل بائیڈن کا شکریہ ادا کیا۔

انہوں نے کہا کہ ایک طرف جہاں امریکہ کے پاس اعلیٰ درجے کے تعلیمی ادارے اور اعلیٰ ترین ٹیکنالوجیز موجود ہیں، وہیں دوسری طرف بھارت کے پاس دنیا میں سب سے زیادہ نوجوان افراد ہیں۔ وزیراعظم نے کہا کہ یہی وجہ ہے کہ اُنہیں یقین ہے کہ بھارت-امریکہ شراکت داری پائیدار اور سبھی کی شمولیت والی عالمی ترقی کا انجن ثابت ہوگی۔ انہوں نے کہا کہ اِسکل انڈیا کے تحت بھارت سرکار نے آرٹیفیشیل انٹلی جینس، بلاک چین، ڈرون اور دیگر شعبوں میں پانچ کروڑ سے زیادہ افراد کو ہُنرمند بنایا ہے۔

وزیراعظم کا استقبال کرتے ہوئے محترمہ جِل بائیڈن نے کہا کہ وزیراعظم نریندر مودی کے اِس سرکاری دورے کے ساتھ ہی وہ دنیا کی عظیم ترین اور سب سے بڑی جمہوریتیں ایک ساتھ آرہی ہیں۔

انہوںنے کہا کہ دونوں ملکوں کے یہ تعلقات صرف سرکاروں سے متعلق نہیں ہیں بلکہ یہ دونوں ممالک کے درمیان خاندانوں اور باہم دوستی کا جشن منارہے ہیں۔ محترمہ بائیڈن نے کہا کہ امریکہ-بھارت شراکت داری وسیع اور گہری ہے، کیونکہ دونوں ممالک عالمی چیلنجز سے مشترکہ طور پر نمٹتے ہیں۔