ایک مخصوص کاروباری گروپ کے خلاف مبینہ رشوت ستانی کے چارجز سمیت متعدد معاملات پر اپوزیشن کی ہنگامہ آرائی کے دوران راجیہ سبھا کی کارروائی دِن بھر کے لیے ملتوی کردی گئی۔ پہلی التوا کے بعد راجیہ سبھا کی کارروائی ساڑھے گیارہ بجے دوبارہ جیسے ہی شروع ہوئی، کانگریس، بائیں بازو، ڈی ایم کے، ٹی ایم سی، سماجوادی پارٹی، عام آدمی پارٹی اور دیگر پارٹیوں نے مذکورہ معاملے پر ہنگامہ جاری رکھا،جس کی وجہ سے کارروائی دِن بھر کیلئے ملتوی کرنا پڑی۔ اِس سے پہلے آج صبح جب راجیہ سبھا کی کارروائی شروع ہوئی،چیئرمین جگدیپ دھنکھڑ نے ایک مخصوص کاروباری گروپ  کے خلاف مبینہ رشوت کے معاملے سمیت، منی پور اور اترپردیش کے سنبھل میں تشدد کے خلاف اپوزیشن ممبران کے ذریعہ پیش کردہ رُول 267 کے تحت التوا کے نوٹس کو خارج کردیا۔ لوک سبھا میں پہلی التوا کے بعد دِن کے 12 بجے کارروائی جیسے ہی شروع ہوئی، کانگریس، سماجوادی پارٹی، ڈی ایم کے، ٹی ایم سی اور دیگر اپوزیشن پارٹیوں کے ارکان مخصوص کاروباری گروپ اور دیگر معاملات کے خلاف نعرہ لگاتے ہوئے ایوان کے وسط میں آگئے۔ پریزائڈنگ آفیسر نے ایوان میں کام کاج جاری رکھنے پر زور دیا، تاہم انھوں نے اپنا احتجاج جاری رکھا، جس کی وجہ سے لوک سبھا کی کارروائی دِن بھر کیلئے ملتوی کردی گئی۔ x