آج تیسرے پہر پونے میں دوسرے کرکٹ ٹسٹ میچ میں نیوزی لینڈ نے بھارت کو 113 رَن سے ہرا دیا۔ اِس کامیابی سے مہمان ٹیم نے تین میچوں کی سیریز جیت لی ہے۔ نیوزی لینڈ نے بھارت کی جیت کیلئے 359 رَن کا نشانہ رکھا تھا اور اس کا تعاقب کرتے ہوئے بھارت کی پوری ٹیم اپنی دوسری اننگز میں 245 رَن پر آؤٹ ہوگئی، جبکہ آج میچ کا تیسرا دن تھا۔ پہلی اننگز میں مہمان ٹیم نے 259 رَن بنائے تھے، جبکہ بھارت کی پوری ٹیم 156 رَن پر آؤٹ ہوگئی تھی۔ مہمان ٹیم نے اپنی دوسری اننگز میں 255 رن بنائے تھے۔ نیوزی لینڈ نے بنگلورو میں کھیلا گیا پہلا ٹسٹ میچ بھی 8 وکٹ سے جیتا تھا۔