وزیر داخلہ امت شاہ نے مدھیہ پردیش میں تین نئے فوجداری قوانین کے نفاذ سے متعلق ایک جائزہ میٹنگ کی صدارت کی۔ نئی دلّی میں منعقدہ اِس میٹنگ کے بعد وزارت داخلہ کی جانب سے جاری بیان میں کہا گیا ہے کہ جناب شاہ نے مدھیہ پردیش میں تینوں نئے فوجداری قوانین کے نفاذ سے متعلق پیش رفت پر مدھیہ پردیش حکومت کی کوششوں کی تعریف کی۔ بیان کے مطابق جناب شاہ نے ریاست میں اِن تینوں فوجداری قوانین کے جلد سے جلد سو فیصد نفاذ کی ضرورت پر زور دیا۔
میٹنگ کے دوران جناب شاہ نے کہا کہ دہشت گردی اور منظم جرائم کے تحت کیس درج کرنے سے پہلے سینئر پولیس افسران کو یہ دیکھنا چاہیے کہ متعلقہ کیس، اِن دفعات کے نفاذ کا اہل ہے یا نہیں۔
وزیر داخلہ نے کہا کہ اِن قانونی گنجائشوں کے غلط استعمال سے نئے فوجداری قوانین کے تقدس میں کمی واقع ہوتی ہے۔