وزیر خارجہ ایس جے شنکر اور متحدہ عرب امارات کے اُن کے ہم منصب شیخ عبداللہ بن زائد النہیان آج نئی دلّی میں بھارت-متحدہ عرب امارات اسٹریٹیجک مذاکرات کریں گے۔ UAE کے وزیر خارجہ آج سہ پہر وزیر اعظم نریندر مودی سے بھی ملاقات کریں گے۔ متحدہ عرب امارات کے نائب وزیراعظم اور وزیر خارجہ چوتھے اسٹریٹیجک مذاکرات اور بھارت-UAE مشترکہ کمیشن کی پندرہویں میٹنگ میں شرکت کرنے کیلئے کَل رات نئی دلّی پہنچے۔ UAE کے رہنما کا خیرمقدم کرتے ہوئے وزارت خارجہ کے ترجمان رندھیر جیسوال نے ایکس پر ایک پوسٹ میں کہاکہ اُن کے اِس دورے سے بھارت اور متحدہ عرب امارات کے درمیان کثیر جہتی جامع اسٹریٹیجک شراکت داری میں مزید اضافہ ہوگا۔
ہمارے نامہ نگار نے خبر دی ہے کہ بھارت اور متحدہ عرب امارات کے درمیان صدیوں سے تجارتی تعلقات ہیں۔ 2022-23 کے دوران UAE، بھارت کیلئے چوتھا بڑا براہ راست غیرملکی سرمایہ کاری کرنے والا ملک رہا۔ UAE نے بھارت کے بنیادی ڈھانچے کے سیکٹر میں 75 ارب ڈالر کی سرمایہ کاری کرنے کا ارادہ کیا ہے۔ مغربی ایشیائی ملک متحدہ عرب امارات میں 35 لاکھ بھارتی افراد مقیم ہیں اور اماراتی بھارت کی ثقافت سے پوری طرح واقف ہیں۔ وہاں بھارتی سنیما، ٹی وی اور ریڈیو چینلز آسانی سے دستیاب ہیں اور بڑی تعداد میں لوگ انہیں دیکھتے اور سنتے ہیں۔