وزیر اعظم نریندر مودی کل ”جن جاتیہ گورَو دیوَس“ کے موقع پر بہار میں جموئی کا دورہ کریں گے، جہاں وہ قبائلی امور کی وزارت کے زیر اہتمام منعقد کیے جانے والی ”جن جاتیہ گورَو دیوس“ کی تقریب میں شرکت کریں گے۔ یہ تقریب، دھرتی آبا بھگوان بِرسا مُنڈا کے 150 ویں یوم پیدائش کی تقریبات کے آغاز کے موقع پر منعقد کی جا رہی ہے۔ جناب مودی کل صبح بھگوان برسا منڈا کے اعزاز میں ایک یادگاری سکّہ اور ایک ڈاک ٹکٹ جاری کریں گے۔ وہ 6 ہزار 640 کروڑ روپے سے زیادہ مالیت کے متعدد ترقیاتی پروجیکٹوں کا افتتاح بھی کریں گے اور سنگِ بنیاد رکھیں گے، تاکہ قبائلی برادریوں کی ترقی اور خطّے کے دور دراز کے دیہی علاقوں میں بنیادی ڈھانچے کو بہتر بنایا جا سکے۔آکاشوانی دلّی کل اپنے ایف ایم گولڈ اور اندرپرستھ چینلوں پر دن میں ساڑھے گیارہ بجے سے اس تقریب کو براہِ راست نشر کرے گا۔