قومی راجدھانی کے پرشانت وہار علاقے میں آج ایک چھوٹے سے پارک کی چہار دیواری کے نزدیک کم شدت کا دھماکہ ہوا۔ اِس واقعے کی اطلاع ملنے کے بعد دلّی پولیس، فورینسک سائنس لیباریٹری کی ٹیم، آگ بجھانے والا عملہ اور ایمبولینس فوراً جائے واقعہ پر پہنچ گئے۔ دلّی پولیس کے PRO سنجے کمار تیاگی نے بتایا کہ ایک شخص بہت ہی معمولی طور پر زخمی ہوا، جسے فوراً اسپتال لے جایا گیا جہاں اُسے ابتدائی طبی امداد دیئے جانے کے بعد ڈسچارج کر دیا گیا۔ انہوں نے کہا کہ دھماکے کی وجہ معلوم کی جا رہی ہے۔