دلّی حکومت نے قومی راجدھانی میں آلودگی میں اضافے کے پیش نظر سبھی طرح کے آتش بازی کے سامان کی تیاری، انہیں ذخیرہ کرنے اور  فروخت کرنے پر آج مکمل طور پر پابندی نافذ کردی ہے۔ یہ پابندی آج سے آئندہ برس پہلی جنوری تک نافذ رہے گی۔ آلودگی کی روک تھام سے متعلق دلّی کمیٹی نے اس سلسلے میں ایک حکم بھی جاری کیا ہے، جس کے تحت سبھی طرح کے پٹاخوں کی آن لائن مارکیٹنگ پلیٹ فارم کے ذریعہ فراہمی اور انہیں چھوڑنے پر بھی پابندی شامل ہے۔

دلّی کے ماحولیات کے وزیر گوپال رائے نے سوشل میڈیا کی ایک پوسٹ پر کہا ہے کہ موسم سرما میں بڑھتی آلودگی کے تناظر میں یہ پابندی نافذ کی گئی ہے۔ انہوں نے دلّی کے لوگوں سے اس سلسلے میں تعاون کرنے کی اپیل کی ہے۔×