عام آدمی پارٹی کے کنوینر اروند کجریوال نے دلی چناؤ سے قبل قومی راجدھانی کے لوگوں کے لیے کئی طرح کی گارنٹیوں کا اعلان کرتے ہوئے پارٹی کا انتخابی منشور جاری کیا ہے۔ آج نئی دلی میں نامہ نگاروں کو جانکاری دیتے ہوئے جناب کجریوال نے پھر سے اقتدار میں آنے پر اگلے پانچ سال میں 15 گارنٹیاں پوری کرنے کا وعدہ کیا۔ اِن میں روزگار کے مواقع، علاج کے لیے سنجیونی اسکیم، ہر خاتون کے لیے اکیس سو روپے ماہانہ کا مالی فائدہ اور پانی کے پرانے بل معاف کرنا شامل ہے۔ انہوں نے بی جے پی اور کانگریس پر دلی کے لوگوں سے جھوٹے وعدے کرنے کا الزام لگایا۔
اِدھر بی جے پی نے عام آدمی پارٹی پر دلت مخالف ہونے کا الزام لگایا ہے۔ ایک پریس کانفرنس میں بی جے پی کے سرکردہ لیڈر سمبت پاترا نے الزام لگایا کہ پنجاب کے امرتسر میں ڈاکٹر بھیم راؤ امبیڈکر کے مجسمے کی بے حرمتی کی گئی ہے۔ انہوں نے اِس حرکت کو شرمناک قرار دیا اور کہا کہ اس واقعے سے ریاست میں امن وقانون کی صورتحال کی عکاسی ہوتی ہے۔ جناب پاترا نے پارٹی کے کنوینر اروند کجریوال سے معافی مانگنے کا مطالبہ کیا۔