دلّی ہائیکورٹ نے کالے دھن کو جائز بنانے کے کیس میں دلّی کے وزیر اعلیٰ اروند کجریوال کو دی گئی ضمانت کو چیلنج کرنے والی انفورسمنٹ ڈائریکٹوریٹ، ED کی عرضداشت پر سماعت کیلئے 7 اگست کی تاریخ مقرر کی ہے۔ اِس سے پہلے ہائیکورٹ نے کجریوال کو ضمانت دینے کے ٹرائل کورٹ کے 20 جون کے فیصلے پر روک لگا دی تھی۔ کجریوال کے وکیل نے جسٹس نینا بنسل کو بتایا کہ انفورسمنٹ ڈائریکٹوریٹ نے اُنھیں اتوار کی دیر رات اپنے جواب کی نقل فراہم کی ہے اور وہ اپنا جواب داخل کرنے کیلئے کچھ وقت چاہتے ہیں۔ انھوں نے مزید کہا کہ سپریم کورٹ نے جمعہ کے روز اِس معاملے میں جناب کجریوال کو عبوری ضمانت دے دی ہے اور وہ اِس کے حکم پر مبنی نقل پیش کریں گے۔ وکیل نے جواب داخل کرنے کیلئے عدالت سے 15 دن کی مہلت کی درخواست کی ہے۔