ہاکی میں، خواتین کے ایشیائی ہاکی چمپئنز ٹرافی کے اپنے افتتاحی میچ میں، دفاعی چمپئن بھارت نے آج بہار کے راجگیر میں ملیشیا کو چار-صفر سے ہرا دیا۔ اس سے قبل جاپان اور جنوبی کوریا کے درمیان افتتاحی میچ دو-دو سے برابر رہا۔ دن میں ایک اور میچ میں چین نے تھائی لینڈ کو پندرہ-صفر سے شکست دی۔ وزیر اعلیٰ نتیش کمار نے شاندار آتش بازی اور ناظرین کے پُرجوش نعروں کے درمیان آج شام باقاعدہ طور پر اس دس روزہ ٹورنامنٹ کا آغاز کیا۔ یہ سب سے بڑا کھیل کود کا مقابلہ بہار میں پہلی مرتبہ منعقد کیا جارہا ہے۔