جموں وکشمیر میں اسمبلی انتخابات کے پہلے مرحلے کیلئے کاغذاتِ نامزدگی داخل کرنے کی کارروائی آج سے شروع ہوگئی ہے۔ پہلے مرحلے میں پلوامہ، اننت ناگ، شوپیاں، کُلگام، رام بن، کشتواڑ اور ڈوڈا ضلعوں کے 24 اسمبلی حلقوں میں 18 ستمبر کو ووٹ ڈالے جائیں گے۔ بھارتی انتخابی کمیشن کے اعلان نامے کے مطابق، امیدوار 27 اگست تک ان حلقوں کیلئے کاغذاتِ نامزدگی جمع کراسکتے ہیں۔ ان کاغذات کی جانچ 28 اگست کو، کی جائے گی۔ نام واپس لینے کی آخری تاریخ 30 اگست ہے۔