ترکی کی پارلیمنٹ نے صومالیہ میں ترکی کی مسلح افواج کے اہلکاروں کو تعینات کئے جانے سے متعلق ایک تحریک منظور کی ہے۔ ترکی کے فوجیوں کو دو سال کیلئے صومالیہ میں تعینات کیا جائے گا تاکہ وہ دہشت گردی اور دیگر خطرات کے خلاف وہاں کی سکیورٹی کوششوں میں معاونت کرسکیں۔

فروری میں ترکی اور صومالیہ کے درمیان دفاعی اور اقتصادی اشتراک سمجھوتہ ہونے کے تناظر میں یہ فیصلہ کیا گیا ہے۔ اِس کا مقصد صومالیہ کی بحری دفاعی صلاحیت کو مستحکم بنانا ہے۔

اِس سے قبل ترکی کی توانائی کی وزارت نے اِس سال تیل اور گیس کی تلاش سے متعلق ایک بحری جہاز صومالیہ کے ساحل پر بھیجنے کے منصوبے کا اعلان کیا تھا جو دونوں ملکوں کے درمیان ہائیڈرو کاربن اشتراک کا ایک حصہ ہے۔x