بھارت اور نیوزی لینڈ کے درمیان تین ٹیسٹ میچوں کی سیریز کا آخری میچ آج ممبئی کے وانکھیڑے اسٹیڈیم میں شروع ہو رہا ہے۔ یہ میچ اب سے کچھ دیر بعد ساڑھے نو بجے شروع ہوگا۔

نیوزی لینڈ کی ٹیم بنگلورو اور پونے میں کھیلے گئے ٹیسٹ میچوں میں بھارت کو ہراکر یہ سیریز پہلے ہی اپنے نام کرچکی ہے۔ بھارت کی کوشش یہ ہوگی کہ اپنی سرزمین پر مہمان ٹیم کو سیریز کے تینوں میچ جیتنے سے روکا جائے۔

اِس کے علاوہ عالمی ٹیسٹ چمپئن شپ کے فائنل کیلئے کوالیفائی کرنے کی خاطر بھارت کو اپنی امید بھی برقرار رکھنا ہوگی۔ اِس چمپئن شپ سے پہلے بھارت کو چھ ٹیسٹ میچ کھیلنے ہیں اور اِن میں سے پانچ اِس مہینے آسٹریلیا میں کھیلے جائیں گے۔