اطلاعات و نشریات کے مرکزی وزیر اشونی ویشنو نے سوشل میڈیا اور OTT پلیٹ فارمز کیلئے سخت قوانین کا مطالبہ کیا ہے۔ لوک سبھا میں ضمنی سوالوں کا جواب دیتے ہوئے انھوں نے کہا کہ سوشل میڈیا پر بے حیائی کے مواد کو روکنے کیلئے موجودہ قوانین کو یقینی طور پر مزید مضبوط بنانے کی ضرورت ہے۔ جناب ویشنو نے کہا کہ ایک طرف آج سوشل میڈیا پریس کی آزادی کا ایک بہت بڑا ذریعہ ہے، وہیں دوسری طرف سوشل میڈیا پر ایڈیٹوریل چیک نہ ہونے کی وجہ سے کئی قسم کا بیہودہ مواد بھی ڈالا جارہا ہے۔ OTT پلیٹ فارمز پر مواد کے بارے میں جناب ویشنو نے کہا کہ ہمارے ملک کی ثقافت اور اُن ممالک کی ثقافت، جہاں سے یہ سوشل میڈیا پلیٹ فارم آیا ہے، کے درمیان بہت فرق ہے۔

انہوں نے کہا کہ پارلیمنٹ کی متعلقہ قائمہ کمیٹی کو اس معاملے کو اٹھانا چاہیے اور اس کے لیے سخت قوانین وضع کئے جانے چاہئیں۔

وزیر موصوف نے کہا کہ حکومت نے انفارمیشن ٹیکنالوجی ایکٹ کے تحت آئی ٹی ضوابط 2021 کو نوٹیفائی کیا ہے۔ یہ ضابطے OTT پلیٹ فارمز کے پبلشرز کے لیے اخلاقیات کا ایک ضابطہ فراہم کرتے ہیں، جس کے تحت پبلشرز کو کوئی ایسا مواد منتقل نہیں کرنا چاہئے، جو قانونی طور پر ممنوع ہو اور عمر کی بنیاد پر پانچ زمروں میں مواد کی درجہ بندی کرنی چاہئے۔ اس ضابطے میں یہ بات بھی کہی گئی ہے کہ OTT پلیٹ فارم کو عمر کے لحاظ سے بچوں کیلئے مواد کو محدود کرنے کیلئے مناسب حفاظتی اقدامات کرنے چاہئیں۔

جناب ویشنو نے کہا کہ اس سال مارچ میں اطلاعات و نشریات کی وزارت نے اس سلسلے میں کارروائی کی اور آئی ٹی ایکٹ کی دفعات کے تحت اٹھارہ OTT پلیٹ فارمز کو فحش اور بیہودہ مواد شائع کرنے پر بلاک کردیا۔