اطلاعات ونشریات کی وزارت نے سبھی پرائیویٹ سیٹیلائٹ ٹی وی چینلس کو ایک ایڈوائزری جاری کرکے اُن سے کہا ہے کہ وہ قدرتی آفات کے ویڈیو، تاریخ اور وقت کے ساتھ دکھائیں۔ ایڈوائزری میں کہا گیا ہے کہ جب بھی کوئی قدرتی آفت یا تباہی کا کوئی واقعہ پیش آتا ہے تو ٹی وی چینلس کئی دن تک لگاتار اس کی coverage کرتے ہیں لیکن اُس دن کی فوٹیج بار بار دکھاتے ہیں، جس دن یہ واقعہ پیش آیا تھا۔

وزارت نے کہا ہے کہ اِس سے ناظرین میں غیرضروری ابہام اور گھبراہٹ کی کیفیت پیدا ہوتی ہے۔ ٹی وی چینلس کو یہ صلاح دی گئی ہے کہ وہ اِس بات کو یقینی بنائیں کہ اِس طرح کے واقعات کی تصویروں کے ساتھ تاریخ اور وقت کو نمایاں انداز سے دکھایا جائے تاکہ اِسے دیکھنے والوں میں کسی طرح کی غلط فہمی پیدا نہ ہو۔