اسرائیل، غزہ جنگ بندی اور یرغمال بنائے گئے افراد کی رہائی سے متعلق معاہدے کے پہلے مرحلے کے تحت 735 فلسطینی قیدیوں کو رہا کرے گا، جس پر اُس نے حماس کے ساتھ اتفاق کیا تھا۔ اسرائیل کی وزارت انصاف نے ایک بیان میں کہا ہے کہ اِس معاہدے کا اطلاق کَل سے ہوگا اور یہ تین مراحل پر مبنی ہوگا۔ پہلے مرحلے کے تحت 42 دنوں کے دوران یرغمال بنائے گئے 33 اسرائیلیوں کے رہا کئے جانے کا امکان ہے۔ وزارت نے 25 نابالغوں اور 16 اور 18 برس کے درمیان افراد کے علاوہ، رہا کئے جانے والے سبھی قیدیوں کے نام جاری کئے ہیں۔ وزارت کا یہ بیان اسرائیلی حکومت کی جانب سے منظوری کے کچھ دیر بعد ہی جاری کیا گیا ہے جس سے کَل سے معاہدے کے نفاذ کی راہ ہموار ہوگئی ہے۔