اتراکھنڈ کے الموڑہ ضلعے میں آج صبح ایک بس کے گہری کھائی میں گر جانے سے 36 مسافروں کی موت ہوگئی، جبکہ 15 افراد زخمی ہوئے ہیں۔ جائے حادثہ پر بچاؤ اور امدادی کارروائی زوروشور سے جاری ہے۔ یہ بس Gaulikhal علاقے سے رام نگر جارہی تھی اور اِس میں 51 مسافر سوار تھے۔SDRF، NDRF، پولیس اور مقامی حکام امدادی کارروائی میں لگے ہوئے ہیں۔ صدر جمہوریہ دروپدی مرمو، وزیراعظم نریندر مودی اور اتراکھنڈ کے وزیراعلیٰ پشکر سنگھ دھامی نے اِس حادثے میں لوگوں کی موت ہونے پر رنج و غم کا اظہار کیا ہے۔ وزیراعظم نے اِس حادثے میں مرنے والوں کے لواحقین کیلئے وزیراعظم کے امدادی فنڈ سے 2-2 لاکھ روپے کی امداد کا اعلان کیا ہے، جبکہ زخمیوں کو 50-50 ہزار روپے دیئے جائیں گے۔ وزیراعلیٰ پشکر سنگھ دھامی نے مرنے والوں کے کنبوں کیلئے 4-4 لاکھ روپے کی مالی امداد کا حکم دیا ہے، جبکہ زخمیوں کو ایک-ایک لاکھ روپے دیئے جائیں گے۔ اُنہوں نے کماؤں ڈویژن کے کمشنر کو ہدایت دی ہے کہ اِس حادثے کی انکوائری مجسٹریٹ سے کرائی جائے۔