بھارتی محکمہ موسمیات IMD نے پیشگوئی کی ہے کہ اگلے دو سے تین روز کے دوران شمال مغربی اور وسطی بھارت میں سردی کے حالات رہنے کا امکان ہے اور اس کے بعد اس میں کمی آئے گی۔ IMD کے مطابق جموں وکشمیر، لداخ، پنجاب، ہریانہ، چنڈی گڑھ، راجستھان، اترپردیش، مدھیہ پردیش اور چھتیس گڑھ کے زیادہ تر حصوں میں اگلے دو روز کے دوران شدید سے انتہائی شدید سردی کے حالات رہیں گے۔مشرقی بھارت میں گنگا کے علاقے والے مغربی بنگال، بہار اور جھارکھنڈ میں بھی کَل تک اِسی طرح کے حالات رہیں گے۔ میڈیا سے بات کرتے ہوئے IMD کی سائنسداں ڈاکٹر سوما سین رائے نے بتایا کہ مغرب کی سمت سے ہونے والی موسم کی تبدیلی کی وجہ سے درجہئ حرارت میں اچانک گراوٹ آئی ہے۔ درجہ حرارت میں فوری طور پر چار سے پانچ ڈگری تک کی کمی ہوئی ہے۔