امریکہ میں وہائٹ ہاؤس نے اعلان کیا ہے کہ ملک میں 30 دن سے زیادہ رہنے والے تمام غیرملکی شہریوں کو وفاقی حکومت کے پاس خود کا اندراج کرانا ہوگا۔ ایسا نہ کرنے کی صورت میں اُن پر جرمانہ، قید اور ملک بدر کئے جانے سمیت دوسری کارروائی کی جاسکتی ہے۔ نئے ضابطے کے مطابق غیرملکیوں کو، جن میں قانونی دستاویزات اور ویزا رکھنے والے غیرملکی باشندے بھی شامل ہیں، سبھی کو ہر وقت اپنے پاس اندراج کا ثبوت رکھنا ہوگا۔ امورِ داخلہ کے محکمے نے وضاحت کی ہے کہ اِس مہینے کی 11 تاریخ کے بعد امریکہ میں داخل ہونے والے افراد کو 30 دن کے اندر اندر خود کا اندراج کرانا ہوگا۔ 14 سال کی عمر کے ہونے والے بچوں کو دوبارہ اندراج کرانا ہوگا، چاہے انہوں نے پہلے کسی بھی طرح کا اندراج کرایا ہو۔