मुख्यमंत्री भजनलाल शर्मा कह्यो है के हिन्दी रा प्रचार-प्रसार री सगळां री जिम्मेदारी है। वे सोमवार ने गृह मंत्रालय रा राजभाषा विभाग री ओर ऊं जयपुर मांय राख्यी ज्या संयुक्त क्षेत्रीय राजभाषा सम्मेलन मांय बोल रह्या हा। वे कह्यो के राजभाषा हिन्दी भाषा, संस्कृति, सोच अर विचारां रो मज़बूत रूप है। डिजिटल ज़माना मांय हिन्दी रा महत्त्व रो जिकर करता थकां मुख्यमंत्री कह्यो के कम्प्यूटर माथे हिन्दी मांय काम करण रा नुवा तरीकां अर सुबीतां ऊं केई पहल करी जा रही है। सम्मेलन मांय केंद्रीय गृह राज्य मंत्री नित्यानंद राय कह्यो के देश री न्यारी-न्यारी भाषावां रो मान बणायो राखता थकां हिन्दी ने राष्ट्रीय बोलचाल री भाषा बणावण सारू सगळा ने मिल र कोशिश करणी व्हेला। वे कह्यो के जनता रा भला री बात वां री भाषा मांय पूगावण ऊं ई लोकतंत्र मज़बूत बण सके है। श्री राय कह्यो के कह्यो के सरल अर आसान भाषा काम ले र राजभाषा अर जनभाषा बीचे दूरी खत्म करणी व्हेला। उपमुख्यमंत्री डॉ. प्रेमचंद बैरवा कह्यो के भारत ही नहीं बल्कि दूजा देशां मांय ई हिन्दी भाषा घणी पसंद करी जावे है। वे भारत री भाषावां री बेहतरीन साहित्यिक लेखन रो अनुवाद हिन्दी मांय अर हिन्दी रा लेखन रो अनुवाद भारत री दूजी भाषावां मांय करण माथे ज़ोर दीनो। श्री बैरवा कह्यो के भाषायी सद्भाव ऊं देश रा एका री भावना ने मज़बूत करी जा सके है। ईं मौके सरकारी कामकाज मांय हिन्दी मांय बेहतरीन काम करण वाळा केन्द्र सरकार रा दफ़्तरां, सरकारी बैंकां अर सरकारी उपक्रमां री 110 प्रतिभावां रो मान करी ज्यो। कार्यक्रम मांय जयपुर री सांसद मंजू शर्मा अर राजभाषा विभाग री सचिव अंशुली आर्य अर संयुक्त सचिव डॉ. मीनाक्षी जौली समेत 16 राज्यां अर केंद्र रा राज वाळा प्रदेशां मांय केंद्र सरकार रा दफ्तरां, बैंकां अर सरकारी उपक्रमां रा आला अहलकार मौजूद रह्या।