मुख्यमंत्री भजनलाल शर्मा राज्यपाल रा अभिभाषण माथे व्ही चर्चा रो शुक्रवार ने विधानसभा मांय विपख रा हंगामा बीचे जवाब दीनो। मुख्यमंत्री कह्यो के वां रा राज मांय वंचित, पीड़ित, मजदूर अर पिछाड़ी तबका री जनता रा भला सारू लगातार काम कर्यो जावेला। केंद्रीय बजट मांय प्रदेश रो जिक्र नी व्हेवण रा विपख रा आरोप रा जवाब मांय श्री शर्मा कह्यो के जल जीवन मिशन रा तैत काम करावण बाबत् राज्य ने चोखी रकम मिली है। ईं सागे ई केंद्रीय करां मांय राज्य री भागीदारी ई बध र 85 हजार 716 करोड़ रुप्या व्हे जावेला। वे कह्यो के केंद्रीय बजट मांय करी ज्या प्रावधानां ऊं जनता बत्तो खर्चो कर सकेला अर विकास रो गेलो साफ व्हेला। विपख कानी ऊं उठायी ज्या केई मुद्दां रा जवाब मांय मुख्यमंत्री कह्यो के कांग्रेस केवल वायदा कीना, पण मौजूदा सरकार जो कह्यो है वां ने करण माथे भरोसो करे है। श्री शर्मा कह्यो के संशोधित ईआरसीपी सारू मध्यप्रदेश अर केंद्र सरकार सागे करी ज्यो एम ओ ए कोई ई देख सके है। मुख्यमंत्री कह्यो के लारला एक साल मांय पूरी साफ-गोई सागे नौकरियां दीरीजी, जिण रो ब्यौरो कार्मिक विभाग री वेबसाइट माथे देख्यो जा सके है।मुख्यमंत्री रा जवाब री बगत विपख रा सदस्य वेल मांय आ र फोन टैप करण रा मामला री जांच री मांग करता थकां नारा लगाया। रीत मुजब मुख्यमंत्री रा भाषण ऊं पैली विपख रा नेता ने ई बजट माथे व्ही बहस मांय शिरकत करणी ही, पण वे शिरकत नी कीनी। विपख रा सदस्य ईं मुद्दा माथे मुख्यमंत्री ऊं जवाब देवण री मांग कीनी, जद के सत्ता पख रा विधायक ईं मुद्दा ने बेबुनियाद बतायो। इण ऊं पैली नगरीय विकास अर आवासन मंत्री झाबर सिंह खर्रा सदन ने बतायो के प्रधानमंत्री आवास योजना रा पहला दौर रा तैत प्रदेश मांय 2 लाख 88 हजार 550 मकान बणावण री मंजूरी दीरीजी ही, ज्यां मांय ऊं हाल तांई एक लाख 96 हजार ऊं बत्ता मकान बणा दिया ज्या है, जद के 73 हजार ऊं बत्ता मकान बण रह्या है। वे बतायो के योजना रा पहला दौर मांय बण रह्या मकानां रो काम बेगो ई पूरो करायो जावेला। सदन मांय भूजल मंत्री कन्हैया लाल बतायो के राज्य मांय जमीं हेटे ऊं पाणी काढबा री रेट डोढ सौ फीसदी रही है। वे कह्यो के सरकार जमीं हेटे पाणी रो लेवल बधावण अर बिरखा रो पाणी बचावण सारू असरदार तरीका ऊं काम कर रही है। ग्रामीण विकास राज्यमंत्री ओटाराम देवासी बतायो के प्रदेश मांय मनरेगा रा तैत करीब 85 लाख जॉब कार्ड काम कर रह्या है। विधानसभा रा बजट सत्र रो पहलो दौर शुक्रवार ने खत्म व्हे ग्यो। सत्र रो दूजो दौर 19 फरवरी ऊं व्हेला जिण ई दिन राज्य रो माली साल 2025-26 रो बजट पेश कर्यो जावेला।